شبرا الثانوية

 أول يوم في المدرسه:
 
 

دخلت الفصل، لقيته كبير أوي، فيه حوالي 30 بنت و20 ولد. بصراحة، كنت متوترة شوية
أول حاجة عملتها، بصيت على الورقة اللي فيها أسماء الطلاب، عشان أتأكد إن اسمي موجود. الحمد لله، اسمي كان موجود
 



لقيت الديسك الأخير فاضي، زي ما كنت متوقعة. قعدت فيه على طول، ده مكاني المفضل من أيام الإعدادية، بحب أقعد بعيد عن الدوشة، وأركز في اللي بيحصل.
كان معايا تاليا صاحبتي، كنا بنقعد مع بعض من أيام الإعدادية. الديسك كان واسع، بياخد اتنين بس، فكانت القاعدة مريحة.





وأنا قاعدة، بصيت كده على آخر صف، لقيت سامي قاعد في آخر مكان على اليمين. والغريبة بقى، البنت اللي كان واقف معاها في ساحة المدرسة، كانت قاعدة في الديسك اللي جنبه. كانوا قريبين من بعض أوي





اليوم كان طويل أوي، علينا سبع حصص
أول حصة كانت جغرافيا، ودخل مدرس شكله طيب، بس كان بيتكلم كتير أوي. بدأ يشرح عن التضاريس والمناخ، بصراحة كنت سرحانة شوية، بس حاولت أركز معاه.





وأنا مركزة مع المدرس، لمحت البنت اللي قاعدة جنب سامي بتبص عليا. أول ما عينها جت في عيني، حولت وشها الناحية التانية، وضحكت بسخرية. بصراحة، الحركة دي استفزتني أوي، بس حاولت أطنشها، وأركز في الحصة. وسامي كمان كان باصص عليا و رجع بص على البنت اللي معاه و اتكلموا و ضحكوا.





فجأة، لقيت مدرس الجغرافيا بيبصلي، وبيقولي: "إيه يا آنسة سلمى، سرحانة في إيه؟ قومي قولي كنا بنتكلم عن إيه؟" اتخضيت، وبصراحة ما كنتش مركزة معاه أوي. قمت وقفت، وبدأت أتلعثم، مش عارفة أقول إيه.
وأنا واقفة متلخبطة، لقيت البنت اللي جنب سامي بتضحك بصوت عالي، ضحكة كلها سخرية.
ما استحملتش، حسيت إن الدموع هتفر من عيني، وقعدت تاني أعيط ومش عارفة أعمل إيه.





بعد ما الحصة خلصت، تاليا صاحبتي قالتلي: "متزعليش يا سلمى، عادي يعني، كل الأيام هتبقى بالوضع ده، مليانة قرف. متتركزيش مع حد، وركزي في دراستك بس." حاولت أسمع كلامها، بس بصراحة، كان صعب عليا أوي أطنش اللي حصل.





بعد ما كلام تاليا هدأني شوية، نزلت الحمام، غسلت وشي، ومسحت دموعي. بصراحة، شكلي كان وحش أوي، وشي كان أحمر وعيني وارمة. حاولت أعدل شكلي شوية، عشان ما حدش ياخد باله إني كنت بعيط.





طلعت الفصل تاني، وأنا مستغربة من سامي. مش فاهمة إيه اللي غيره كده. ليه عمل كده؟ ليه ما قاليش من الأول إنه مش هيجي؟ ليه بعتلي رسالة على الواتساب، وبعدين عمل كده؟ طب ما كان عملي بلوك وخلاص، كان أرحم.





قعدت مع نفسي شوية، وفكرت في اللي حصل. قلت لنفسي: "ده مجرد أخ، إيه اللي أنا بفكر فيه ده؟ بلاش عبط بقى يا سلمى." قمت شربت مية، وأكلت حاجة بسيطة مع تاليا، عشان أغير جو، وأنسى اللي حصل. 
عدت أربع حصص، وجه ميعاد الفسحة. بصراحة، كنت متضايقة أوي، ومكنش ليا نفس أنزل الفسحة مع حد. قررت إني هنزل آخر واحدة عشان أكون لوحدي شوية





نزلت الفسحة، وجريت ولعبت مع صحابي، كان إرهاق بس جميل أوي. حسيت إني فرحانة شوية ونسيت اللي حصل في الحصة.
فكرتني بأيام اإبتدائي أول مره افرح كده





 لما طلعت الفصل تاني، لقيت سامي والبنت اللي معاه قاعدين مع صحابهم، بياكلوا وبيضحكوا. اتضايقت أوي لما شفتهم مع بعض.




فجأة، لقيت سامي قام من مكانه، وجه ناحيتي، وسلم عليا، وقالي: "عاملة إيه يا سلمى؟" سلمت عليه، وقلتله: "الحمد لله، شكراً." اتكسفت أوي، وقعدت مكاني، وقلتله: "روح اقعد مع صحابك، شكراً." كنت متضايقة منه أوي، ومش عايزة أتكلم معاه.

قالي: "متزعليش لما قولتلك على الواتساب إني مش جاي، أنا كنت فعلاً مش هعرف أجي، بس حصل ظرف، وعرفت أجي، بس ملحقتش أقابلك." قلتله: "عادي، مش هتفرق"، كنت لسه متضايقة منه، ومش مصدقة كلامه أوي.
قالي: "لو عاوزة أي حاجة، قوليلي، أنا زي أخوكي." قلتله: "ماشي يا خويا.".





يا سلام على الأخوة! معرفش بيضحك بيها على نفسه ولا عليا. المفروض إنه عارف إني بحبه من أيام الإعدادية، وإنه مش مجرد أخ بالنسبة لي. بس الظاهر إنه مش فاهم، أو بيعمل نفسه مش فاهم.
فضلت قاعدة مع نفسي، مستنية اليوم الخرا ده يخلص، عشان أروح مع تاليا. مكنش ليا نفس أعمل أي حاجة، كنت بس عايزة أروح البيت، وأنسى كل اللي حصل.