غلطه بحبها

 أنا تاليا.. ودي حكايتي

عندي 19 سنة، في كلية تجارة جامعة القاهرة، بنت عادية جدًا، ولا كنت وحشة ولا كنت ملاك، كنت بحلم بحياة حلوة، ببيت دافي، بواحد يحبني بجد.. بس أنا اللي وقعت في اللي اسمه الحب، وقعت فيه بكل كياني.. وقعت لدرجة إني سلمتله نفسي.

كان اسمه ياسين، سنة رابعة، أكبر مني، وسيم، وكلامه ساحر.. كان بيضحكلي بطريقة تخليني أحس إني أجمل بنت في الدنيا، كان حضنه أمان، وكلامه سحر، ووعده لي بحياة سوا كان كل اللي بتمناه.. بس أنا كنت عبيطة.

حبيته، وسلمتله قلبي.. وسلمتله كل حاجة. كنت فاكرة إنه هيكون معايا طول العمر، فاكرة إنه وعده مش زي كلام أي حد، فاكرة إني لما أقوله "خايفة"، هيقولي "متخافيش، أنا معاكي".. بس كل اللي حصل، إنه أول ما عرف إني حامل، اختفى.

أنا مش بحكيلك عشان تواسيني، ولا عشان حد يقوللي "ياريتك ما عملتي كده"، أنا أكتر واحدة في الدنيا عارفة إني غلطت، أكتر واحدة بتلوم نفسها كل يوم، وبتبكي ليل ونهار.. بس في وسط الوجع ده كله، كل ما أحط إيدي على بطني، وأحس بنبضهم جوايا، بحس بحاجة غريبة.. بحس إني بحبهم، بحس إني مش ندمانة عليهم، ندمانة على نفسي، على سذاجتي، على إني صدقت الوعود، بس مش ندمانة على ولادي.

عارفة إن الناس هتبصلي وحش، وهيسموني أسامي أنا مش قادرة حتى أكتبها، بس هما مالهمش ذنب، هما أغلى حاجة ليا دلوقتي، هما اللي بيدوني سبب إني أكمل، إني أصحى، إني أعيش.

الدنيا كلها ضدي، وأنا واقفة لوحدي، لا عارفة هقول إيه لأهلي، ولا عارفة هربيهم إزاي، ولا حتى عارفة هواجه بكرة إزاي.. بس اللي متأكدة منه، إني هحارب، وهفضل واقفة، حتى لو الدنيا كلها قالتلي "انتي ضيعتي نفسك"، هقولهم "أنا لسه عايشة.. وعندي سبب أعيش عشانه."

------------ 

بعد فتره كلمني وقاللي "وحشتيني"، قلبي دق بعنف، كنت عارفة إني لازم أقوله لأ، لازم أقفل، بس روحي كانت مشتاقاله، لجسمه، لحضنه، لكلامه اللي بيهدّني حتى لو كله كدب.

رُحت له البيت، فتَحلي الباب وعينيه فيها نفس السحر اللي وقعني زمان، قرب مني، لمسني، وأنا كنت عاوزة كده، كنت عاوزة أحس بالأمان حتى لو لحظي، حتى لو بعده ألم أكتر.

بعد ما خلصنا، بصلي وقاللي بصوت واثق: "متخافيش، أنا مش هسيبك.. هتجوزك، بس استحملي شوية."