.png)
.png)
.png)
روايه قدر العاصفه
قدر العاصفه
2025, أسماء رشدي
رومانسية
مجانا
عاصف ده اسمه.. ولقبه العاصفه.. حياته كلها تحديات.. دكتور عاطل اشتغل كل حاجه.. القدر كاتب له ايه و رايح فين ده اللى هتعرفه وانت بتقرأ.. كل خطوة فى طريق عاصف مليانه كوارث بس هو معاه اللى يسندوه وطريقه طويل بس شريكته عرجاء و مهمته صعبه فى الوصول للسبب ورا انه يتيم.. و ورا مين السبب فى ان حبيبته كده..
أنين
تعيش كأنها محبوسة في كوابيس متكررة يوميًا، وتفضل إخفاء ألمها بالسخرية.ليلى
حنونة، وتخاف على أنين كثيرًا وتشعر بالذنب تجاه وضعها.عاصف
طبيب بشري، لكن يضطر للعمل في أي مهنة توفر له دخلاً شريفًا (نجارة، ميكانيكا...).نسايم
والدة عاصف وحياة
الفصل 1 (في صباح يوم جميل هناك في حي راقي جدا من أحياء القاهرة في أجمل اوضه باللون الوردى ممكن تشوفها تلك دخلت الشمس بنورها البسيط نورت الاوضه بس اللى زادها نور كان جمال الحلوه اللى نايمه عالارض دى وجسمها متلج من الساقعه....وقتها اتفتح باب الاوضه ودخلت ست فى الاربعينات و دى تبقى ليلى المسؤوله عن كل طلبات انين و اللى بتقولها(لولا) بحب و اول ما دخلت اتفاجأت بأنين نايمه عالارض طلعت تجرى عليها و هى قلقانه و صحتها.. ليلى: انين... انون... اصحي يا روحي ايه اللي منيمك في الارض كده.. (فتحت انين عنيها بتعب بتبص حواليها لقت نفسها نايمه عالارض كالعاده زى كل يوم فركت عنيها بتعب و هى بتضحك بسخريه على وضعها قبل ما تقول.. انين: صباح الخير يا لولا هيكون ايه يعني اللي منيمني في الارض السرير بيكهرب يا ستيتقريبا بيحاول يخلص منى.. ليلى برعب: يا لهوي بيكهرب ازاي يعني.. حسبى اما اشوف.. يمكن فى سلك ملمس من اى حته. انين ضحكت: ههههههه استني رايحه فين... هو معقول سرير بيكهرب ليه نايمه على كوبري ده انا كنت بحلم الحلم اياه يا ستي وكالعاده وقعت بالشكل ده على الارض..مش فاهمه سلك ايه ده اللى بتدورى عليه ههههه. ليلى: يا قلبي يا بنتي... ما هو من خوفى عليكى يا انين اعمل ايه وبعدين يا انون لازم نشوف حل في الحلم المزعج ده بقى... كده كتير... بقالك 17 سنه بتشوفيه كل يوم و ما بتناميش ما تشوفي دكتور يا بنتي على الاقل هيطمنا ونعرف فيكى ايه.. انين: دكتور.... اقوله ايه الدكتور ده.... اقول له بقالي 17 سنه بشوف حلم واحد وبيتكرر بشكل مزعج... لا طبعا انتى عايزاهم يقولوا ايه انين العارجه بقت مجنونه كمان... مستحيل ده يحصل... ثم ان فيا ايه يعني منا قدامك اهو كويسه جدا.. (حست ليلى بالزعل على حالة انين لانها من ساعة الحادثه بتاعت والدتها اللي ماتت فيها وهى بتعرج بشكل واضح بسبب اصابتها في رجلها اصابه شديده في الحادثه ومن وقتها و الكل بيتنمر عليها و زى ما بيقولوا( الحلو ما يكملش) ليلى: عارجه ايه... ومجنونه ايه.. قطع لسان اللي يقول عليكى كده ده انتى ست البنات.. هو في واحده في نص جمالك..دول بيقولوا كده من الغيرة ياقلبى والنبى لو تدخلى جواهم هتلاقى سواد مفحم. هههههه. انين متفهمه: سواد و مفحم كمان ههههههه ربنا يخليكى ليا يا لولا... انتى بس اللي شايفه كده... ما علينا ما تدققيش انا احيانا الموضوع ده بيجي على بالي ويزعجني بس عادي يعني اتعودت المهم هو احنا هنفضل على الارض كده كتير.. يلا بقى انا هقوم اخذ دش سريع وانزل افطر معاكي يا ستي ولا انتى ما جهزتيش فطار لسه.. ليلى: يا خبر ما جهزتش فطار ازاي ده انا مجهزه من بدري وقاعده مستنياك بس على الشاى.... يلا خشي انت خدي دش الهنا يا روحي.... بس بقولك ايه قبل ما تنزلي البسي الوش البارد اللي بيخوفني منك ده... ما بعرفكيش وانت متحوله اصل العقربه وبنتها تحت على السفره معلش يا ضنايا... انين بغضب: يوووووه مش ناقصه اصطباحه خالص... عموما لو هي جايه معاهم كده على الصبح ماشي اصبح.. (فى حى تانى بقى ميشبهش ابدا لحى انين لانه شعبى جدا ومتواضع كان نايم الشاب القمر ده بتعب دخلت عليه والدته الاوضه لقته غرقان في النوم صعب عليها لانه بيتعب جدا وهو بيدور على شغل عشان يقدر يعيشهم عيشه كويسه... وساعات كمان بيشتغل فى حاجات ملهاش علاقه بدراسته فهو برغم انه طبيب بشري حسب دراسته الا انه اشتغل فى ورش نجاره وميكانيكا وفى اى شغل كان بيجيب فلوس حلال فبعد ما بصتله وهو نايم تعبان بالشكل ده غيرت رأيها وبدل ما تصحيه كانت خارجه بشويش عشان ميصحاش بس هو سمعها و اتكلم بلهجه قويه. عاصف: تاني يا ماما... ما فيش فايده... بردوا كنتى خارجه من غير ما تصحيني هو مش انا اللي قايلك تصحيني.. انتى ليه محسسانى إنك لو صحتينى هتعملى جريمه و هزعل منك مثلا. (وقفت امه تعض فى صوابعها زى العيال الصغيرة لانه كالعاده قفشها وهى خارجه.. نسايم: ما انت يا حبيبي ما بقالكش ساعتين نايم وشكلك تعبان .. كان لازم اسيبك نايم شويه وبعدين انت بتصعب عليا يا عاصف بتتعب اوي وانت بتدور على شغل اعمل ايه بس يا حبيبي. والله بيصعب عليا اصحيك. عاصف ابتسم: تعبان ايه بس يا نسومه انتى هتأرى عليا ولا ايه... ما انا سبع قدامك اهو اكسر 10 رجاله ولا انتى مش واثقه فيا ولا ايه.. وبعدين لزمتى ايه لو مدورتش و لقيت شغل يعيشنا.. عيب الكلام ده يا نسايم. نسايم ضاحكه: قلب امك انت يا حبيبي.. ربنا يديك الصحه بس انت بتتعب يا عاصف...وانا نفسى اساعدك بس مش عارفه اعمل ايه. ( وقف عاصف قدام امه وهو بيبص للارض باسف لانه برغم انها شايفه انه بيتعب علشان يعيشوا الا انه مش شايف كده لانه لسه بيدور علي شغل لحد دلوقتي وملوش دخل ثابت.. عاصف: وماله لما اتعب يعني هو انا راجل ولا رجل كنبه.. وبعدين هو فين التعب هو انا عارف الاقي شغل ولا عارف اعيشكم عيشه حلوه انا مقصر يا ماما وانا عارف والله... بس مش بايدي على يدك انا ياما دورت على شغل واللي بلاقيه بشتغله حتى لو بعيد عن دراستي اي حاجه بلاقيها ما بقولش لا.. و اصحابى بيجبولى شغل.. بس مينفعش اقف فى اى حاجه وخلاص كده.. لازم تبقى حاجه فلوسها حلال عشان لما اقابل ابويا فى الاخرة اعرف ابص فى وشه.. (حست نسايم بالاسف على ابنها حطت ايدها فوق كتفه طبطبت عليه بحنان وقالت.. نسايم: يا لهووي.. ما تقولش كده ابدا ده انت سيد الرجاله قال رجل كنبه قال... وبعدين مقصر فين اخص عليك هي عشان الدنيا معانده معاك شويه تبقى مقصر هو في زيك يا حبيبي طب يا ريت بس موجود حد في نص طيبه قلبك.. ما تقولش كده تاني يا عاصف عشان ما ازعلش منك..ابوك لما تروحله بعد عمرين طوال يا حبيبي هيقول صحيح كبرت و ربيت راجل بجد و هيبقى فخور بيك يا قلب أمك. ( كان عاصف هيرد على كلام امه لولا دخول اخته حياه بعصبيه و رمت شوية كلام بصوت مخنوق وخرجت بسرعه... حياه: بصوا بقى... انا من النهارده مش هروح الكليه تاني ومن غير ما حد يقولي ليه هو كده... وانت كثر خيرك يا عاصف.. حاولت معايا انى اتعلم بس احنا مش وش كليات وتعليم.. خلاص على كده. ( قالت حياه كلامها بسرعه وخرجت وهى كاتمه الدموع فى عنيها وده قلق عاصف وامه جدا عشان هما عارفين حالة حياة الصحيه... عاصف: يا فتاح يا عليم على الصبح هو اليوم كان ناقص قناه الجزيره... وسعي يا ماما بسرعه اما اشوف فيها ايه. نسايم بخوف: ايوه قوم بسرعه نلحقها يا ابني هي مش حمل نوبه تانيه والله المره اللي فاتت وقعت قلبي.. ( راح عاصف ونسايم ورا حياه من خوفهم عليها من ان يحصلها نوبه ضيق نفس تانيه هما في غنى عنها لان عاصف مبيتحملش يشوف حياه في الحاله دى ابدا ولما بيحصلها كده امه بتتعب جدا من الحزن على بنتها..لما دخل لقاها قاعده عالسرير وشها احمر جدا و عنيها مدمعه وبتحاول تتنفس بشكل طبيعى على اد ما تقدر طلع يجرى قعد جمبها بقلق.. عاصف: بس بس بس... اهدي يا حبيبتي حصل ايه لكل ده انا عايز افهم.. مين اللي اتجرا وزعلك وانا اكدره... ( اتكلمت حياه بصوت مقطع ونفس ضيق جدا .. حياه: انا اللي.... جايبه...... لروحي الزعل..... عشان بتعلم..... في وسط ناس.... جهله..... مش عارفين...... يفهموا ان..... ما فيش فرق بين..... الوزير وبين..... ابويا التربي..... طالما كلنا..... عند ربنا زي..... بعض كل ما يشوفوني..... يقولوا..... بنت التربي اهي.... ويقعدوا... يقولوا كلام.... سخيف عني.... (بص عاصف لحياه بصه طويله وعرف ايه هو سبب حزنها وزعلها ده كله...فهم ان اصحابها فى الكليه لسه بيتنمروا على وضع حياة المادى وان ابوها الله يرحمه كان شغال تربى زعل جدا عليها و قرب منها وقال.. عاصف: وهو انتى مستعره من ابوك يا حياه... ماله يعني التربي قدر يربينا ويطلعنا احسن الناس ويصرف علينا كويس وما كانش حارمنا من اي حاجه.. ولا انت رايك ايه... ( وقفت حياه غضبانه وهي بتتطوح ودايخه وقف قدامها عاصف لما فكرها هتخرج من الاوضه.. حياه: اخص عليك..... يا عاصف.... انا بستعر.... من بابا... ده انا.. انا... ( مكملتش حياه جملتها وفى لحظه نفسها بقى عالى مسكها عاصف بسرعه وهو بيطبطب على وشها بيحاول يهديها شويه وهو بيبصلها بحنان... عاصف: حياه... حياه.اهدي يا حبيبتي انتى ست الناس كلهم والله.. اهدي يا روحي ماما كوبايه ميه بسرعه والنبي يا ماما.. ( امه جرت بسرعه جابت كوباية مايه وكانت هتقع خلى حياه تشرب شوية مايه وبعدين لقاها فقدت الوعي بين اديه وبدأ نفسها في الانتظام حطها فى السرير وغطاها كويس وخرج هو ووالدته.... اطمن عاصف على حياه شوية بس لاحظ ان امه وشها اصفر جدا وباين عليها التعب ... عاصف: مالك يا ماما وشك اصفر كده ليه شكلك مش عاجبني بقالك كام يوم ومتغيره انتى حاسه بحاجه..طمنيني عليكي. نسايم بابتسامه: ما تشغلش بالك يا حبيبي دول شويه صداع وهيروحوا لحالهم... دلوقتي اروح اجيب حاجه من عند العطار وهبقى كويسه...انا بس بدلع عليك وبشوف غلاوتى عندك.. ( بصلها عاصف بزعل لانه عارف انها كالعادة بتخبى انها تعبانه عشان متشيلوش الهم بس كده الموضوع ذاد عن حده... عاصف: لا والله.. عطار ايه... بلاش الكلام ده يا نسايم ما تزعلينيش منك... انتى هتاخدي بعضك زي الشاطره كده وتدخلي تنامي جنب حياه... وما تخليهاش تروح الكليه وما تقوميش من مكانك الا لما اجي... وهجيبلك العلاج وانا راجع يا دوب بس انط في الفانله وانزل على طول.. سمعاني يا نسايم..و لو كان عالدلع ادلعى يختى بس متوقعيش قلبى معاكى. ( لم قدرتش نسايم ترد عليه لاصراره على اللى قاله وفعلا دخلها اوضة حياه تنام ولبس هدومه بسرعه ونزل يقابل فريد اللي كان مستنيه تحت بقاله كتير .. فريد: والله انت قليل الذوق بقالي اكتر من ساعه مستنيك انت فاكر نفسك مين يا جدع انت..؟؟ ده انت حيالله صاحبي..يعني مش المدام ولا المزة عشان تلطعنى كل ده مستنيك. عاصف بنظره قويه: غير اصطباحتك يا فريد.. انا على اخري.. وبعدين من امتى وانت بيجي من طرفك حاجه مهمه زي ما انت عمال تقولي من امبارح... حاجه ايه بقي المهمه اوى دى.. فريد بخوف: هااا... هو انا قلت كده فعلا؟؟ طيب من غير مد ايد بقى هقولك...وانا والله نسيت يعني مكنش قصدي.. عاصف بعصبيه: ما تنطق يا فريد في ايه بدل ما افرمك على الصبح هنفضل نلف وندور حوالين بعض كتير..خش فى الموضوع على طول.. فريد برعب: هنطق.. هنطق اهو.. بصراحه امجد مستنيك على الكافيه بيقول عاوزك في شغل..و اكد عليا كذا مرة ابلغك.. ( قال فريد كلامه وهرب من قدام عاصف بسرعه لانه ميقدرش يواجه العاصفه وعارف انه عصبه وبشده لانه عارف ان عاصف مستنى اى فرصه للشغل والغبى ده كان عارف ان امجد عايزوا فى شغل ومقلوش من امبارح ( وهناك عند انين في نفس الوقت كانت غيرت هدومها بسرعه ونزلت تحت عشان تفطر مع ليلى زى ما وعدتها.... لقت ماجده مرات ابوها وروما بنتها قاعدين بيفطروا على تربيزة السفرة ماجده شافت ليلى وهى رايحه تجرى على انين اول ما شافتها نازله من فوق فقالت.. ماجده: بالراحه يا ماما هي يعني لسه بيبي على اللهفه دي... ولا علشان يعني ههههههه.. روما ضحكت: هههههه وسكتي ليه يا ماما قصدك عشان عارجه يعني.. ما دي الحقيقه قوليها عادي... يعني نكذب ونخش النار علشان خاطر ما نجرحش شعور الانسه. ليلى بغضب: عارجه في عينك يا قليله الادب.. انتى مالك ومالها ايه غيرانه منها ليه...عموما باين اوى إنك غيرانه وكل كلامك الماسخ ده بيقول كده... ثم انها مطلبتش رأيك العظيم يختي. ( اول ما سمعت روما ليلى بتشتمها قامت وقفت وراحت نحيتها وهى بترفع ايدها فى محاوله منها انها تضرب ليلى بالقلم لكن ايد انين كانت اسرع منها ومسكت ايدها بسرعه.... انين: تؤ تؤ تؤ... كده هتزعلي واحتمال ما تشوفيش ايدك تاني.. لولا خط احمر تخين زيك كده ومش مسموح ليكي بالكلام معاها اصلا مش تضربيها.. ومرة تانيه هترفعى ايدك عليها رد فعلى مش هيعجبك.. (وبصت لماجده و كملت كلامها: ما تلمى بنتك يا خالتي.. (بصت لها ماجده بغضب شديد لانها مش بتحبها تقولها يا خالتي قربت منها بعيون مليانه غضب وغل .... ماجده: خالتي ايه يا لوكل انتى اسمي ماجده هانم.. ايه ما بتعرفيش تقوليها اما تربيه سوقيه بصحيح تصرفاتك ملهاش اى علاقه بمستواكى الاجتماعى. روما بغضب: هو ده كل اللي همك يا مامي.. انها قالت عليكى خالتي.... انا تخينه يا عارجه يا مقرفه... ليلى دي حته خدامه هنا مش اكثر.. اضربها_ احرقها_ اجلدها _ما لكيش دعوه.. هو انتى هتتحكمى كمان فى تصرفاتى والله عال.. انين: اولا~ ليلى ليها هنا حق اكثر منكم حاولوا ان انتم تغلطوا معاها وساعتها الحساب هيبقى معايا انا. ثانيا ~انا بقولك يا خالتي عشان لايقه عليكى وعلى سنك اكثر لانك عمرك ما كنتى هانم علشان اقول لك يا ماجده هانم.. شفتى بعرف اقولها ازاي ثالثا~ اه انت تخينه يا مبرومه.. ايه مرايات اوضتك كلها مكسره مش شايفه يعني ولا ايه.. رابعا~ انا خارجه ولو رجعت لقيت شكوى حتى لو صغنونه خالص قدى كدهوت منكم مش هعمل حساب لاي حد فاهمين..جتكوا القرف عصبتونى عالصبح وانا كتت نازله رايقه.. (وبعدين بصت انين لليلى وقالت .. انين: معلش بقى يا لولا الثنائي المرح سد نفسي عن الفطار هعوضهالك وهتغدى معاكي.. جهزلنا اكل حلو بس ليا انا وانتى بس.. يلا عاوزه حاجه انا همشي.. ليلى: عاوزة سلامتك ياقلبي...هعملك الحلو كله يا انون... خلى بالك من نفسك.. ( وفعلا خرجت أنين بسرعه وهى بتحاول تكتم دموعها اللى كانت بتخبيها عشان تبان قوية كالعاده.. لقت روح فى انتظارها قدام باب الفيلا .. انين: روح اطلعي على المكان بتاعنا بسرعه... بسرعه عشان خاطري.. طلعت العربيه و وقفت ليلى قدام الفيلا بتبص عليها ليلى: يا ضنايا يا بنتى مفيش يوم يعدى من غير ما ينكدوا عليكى... الاهى يتسد نفسهم عن الدنيا البعدا.. جت ماجده ورا ليلى و قالت بغل.. ماجده: واقفه عندك بتعملى ايه اتحرمى يلا و ادخلى اعمليلى قهوة بسرعه.. ليلى: لا معلش أنا مش بعمل لحد حاجه غير لانين بس وعابد بيه لو طلب و بالنسبالك يا تقولى لحد تانى يعملك يا تدخلى تعمليها بنفسك.. مشت ليلى من قدامها و وقفت ماجده تكلم نفسها بغيظ.. ماجده: هنشوف انا ولا انتى....